બનાસકાંઠા જિલ્લામાં ‘ગ્રીન મશિન’ હેઠળ સોમવારે એક જ દિવસમાં ૧૫ લાખથી વધુ રોપાનું વાવેતર કરાયું હતું. જિલ્લાનું વહિવટી તંત્ર, વન વિભાગ, સ્વૈચ્છિક સંસ્થાઓ, ગ્રામ પંચાયતો અને પદાધિકારીઓએ આ મશિનમાં ભાગ લઇને ‘વર્લ્ડ રેકોર્ડ’ નોંધાવવાનાં દ્વાર ખોલી દીધા છે.
જિલ્લા કલેક્ટર આર.જે. પટેલના માર્ગદર્શન હેઠળ જિલ્લાના ૧૨ તાલુકાઓમાં વૃક્ષારોપણના મહાઅભિયાનની સોમવારે શરૂઆત કરાઇ હતી. જેમાં એક જ દિવસમાં એક સાથે સવારે ૧૦ થી સાંજે ૫ વાગ્યા સુધીમાં ૧૧ લાખ વૃક્ષો વાવવાની શરૂઆત કરાઇ હતી. જેનો પ્રારંભ રાજ્યના પંચાયત મંત્રી અને જિલ્લાના પ્રભારી નરોત્તમભાઇ પટેલે ડીસા તાલુકાના જુનાડીસાથી છોડ રોપીને કરી હતી. જુનાડીસામાં ૫૦ હેકટર જમીનમાં રોપાનું વાવેતર કરવામાં આવ્યું છે. જેમાં સોમવારે ૧૧,૧૧૧ રોપા વાવ્યા હતા.
‘દિવ્ય ભાસ્કર’ દ્વારા ૬૦૦ ઘરોમાં તુલસી રોપાઇ
આ ગ્રીન મશિનમાં ‘દિવ્ય ભાસ્કર’ દ્વારા વડગામ તાલુકાના ડાલવાણા ગામમાં વિર ફાઉન્ડેશનના સહયોગથી ગામના ૬૦૦ જેટલા ઘરોમાં તુલસીના રોપા વાવવામાં આવ્યા હતા. ગામમાં કુલ ૮ હજાર રોપાઓનું વાવેતર કરાયું છે. જેમાં ૩ હજાર રોપાઓનું એક બીલીવન બનાવવામાં આવ્યું છે.
વર્લ્ડરેકોર્ડ માટે સરકાર નિર્ણય કરશે
બનાસકાંઠા જિલ્લામાં યોજાયેલા વૃક્ષારોપણના મહાઅભિયાનમાં જિલ્લાની પ્રજાએ સ્વયંભૂ જોડાઇને લક્ષ્યાંકથી ઉપર આંકડો વટાવી જનઆંદોલનને સફળ બનાવ્યું છે. આ અંગેનો રિપોર્ટ રાજ્યના અગ્રસચિવ એસ.કે. નંદાને મોકલી અપાશે. જ્યારે વર્લ્ડ રેકોર્ડ માટે સરકાર નિર્ણય કરશે.
No comments:
Post a Comment