પાલનપુર અને ડીસા નગરપાલિકાની ચૂંટણી..

પાલનપુર અને ડીસા નગરપાલિકાની ચૂંટણીને લઇ રાજકીય ધમધમાટ

ઉમેદવારોની યાદી તૈયાર કરવા બંને પક્ષોની ક્વાયત

પાલનપુર અને ડીસા નગરપાલિકાની આગામી તા. ૨૧ મી ઓક્ટોબરે ચૂંટણી યોજાનાર છે. જે ચૂંટણીમાં ઉમેદવારી પત્રો ભરવાની પ્રક્રિયાનો સોમવારથી પ્રારંભ થશે. જેને લઇ જિલ્લામાં રાજકીય ધમધમાટ શરૂ થઇ ગયો છે. ત્યારે ચૂંટણીમાં ભાજપ અને કોંગ્રેસ દ્વારા ઉમેદવારોની પસંદગીની પ્રક્રિયા આખરી તબક્કામાં છે. જેને લઇ ભાજપ અને કોંગ્રેસમાં ટિકીટ મેળવવા રાજકીય દાવ-પેચ ચાલી રહ્યા છે.

પાલનપુર નગરપાલિકાના ૧૪ વોર્ડના ૪૨ સદ્દસ્યો અને ડીસા પાલિકાના ૧૨ વોર્ડના ૩૬ સદ્દસ્યો માટેની ચૂંટણી આગામી તા. ૨૧ ઓક્ટોબરે ચૂંટણી યોજાનારી છે. આ ચૂંટણીમાં ઉમેદવારી પત્રો ભરવાની સોમવારથી પ્રક્રિયા હાથ ધરવામાં આવનારી છે. ચૂંટણી લડવા ઇચ્છતા ઉમેદવારો તા. ૪ ઓક્ટોબર સુધી ઉમેદવારી પત્રો ભરી શકશે.

જે ઉમેદવારી પત્રોની તા. ૬ ઓક્ટોબરે ચકાસણી હાથ ધરાશે. જ્યારે ૭ ઓક્ટોબર સુધી ઉમેદવારો પોતાના ઉમેદવારી પત્રો પરત ખેંચી શકશે. ૨૧મી ઓક્ટોબરે મતદાન બાદ તા. ૨૩ ઓક્ટોબરે મતગણતરી હાથ ધરાશે. આ ચૂંટણીમાં ભાજપ અને કોંગ્રેસ બન્ને પક્ષ દ્વારા સત્તા મેળવવા માટે તમામ સંભવ પ્રયાસો કરવામાં આવી રહ્યા છે.

ચૂંટણીમાં ઉમેદવારોની પસંદગી માટે ભાજપ અને કોંગ્રેસ બન્ને પક્ષના અગ્રણીઓ દ્વારા હાલમાં રાજકીય ક્વાયત ચાલી રહી છે. ટિકીટ મેળવવા ઇચ્છતા ભાજપ-કોંગ્રેસના અગ્રણીઓ છેલ્લી ઘડીના પ્રયાસો કરી રહ્યા છે.

ચૂંટણીને લઇ પાલનપુર અને ડીસામાં રાજકીય ધમધમાટ શરૂ થઇ ગયો છે. ત્યારે પાલનપુરને લઇ ડીસા પાલિકાના સદ્દસ્ય બનવા બન્ને પક્ષોમાં ઉમેદવારોની મોટી ફોજ છે. જેથી ટિકીટ માટે ઉમેદવારોની પસંદગી માટે એ.સી. રૂમમાં બેસતા ભાજપ અને કોંગ્રેસના અગ્રણીઓને પણ પરસેવો પડી રહ્યો છે.

ભાજપ અને કોંગ્રેસ બન્ને પક્ષમાં અનેક બળવાખોરો ઉમેદવારોના નામની યાદી પ્રસિદ્ધ થવાની રાહ જોઇને બેઠા છે. જો કે, બન્ને પક્ષ દ્વારા ઉમેદવારોના ફોર્મ ભરવાના આખરી દિવસોમાં ઉમેદવારોના નામની યાદી જાહેર કરવામાં આવશે તેવું પણ રાજકીય તજજ્ઞો માની રહ્યા છે. પાલનપુર અને ડીસા પાલિકાની આ ચૂંટણીને લઇ બન્ને શહેરમાં રાજકીય હલચલ શરૂ થઇ ગઇ છે.

તા. પં.ની ત્રણ બેઠક તેમજ ધાનેરાપાલિકાની એક બેઠકની પેટાચૂંટણી પણ યોજાશે

પાલનપુર તાલુકા પંચાયતની હાથીદ્રા બેઠક, વડગામ તાલુકા પંચાયતની કોદરામ બેઠક અને ધાનેરા તાલુકા પંચાયતની જડીયા બેઠક ખાલી પડી હોવાથી આ બેઠકો માટે તા. ૨૧ ઓક્ટોબરે પેટા ચૂંટણી યોજાશે. આ ઉપરાંત ધાનેરા નગરપાલિકા વોર્ડ નં. ૧ના સદ્દસ્યની પેટા ચૂંટણી પણ યોજાશે. જે બેઠકો ઉપર ચૂંટણી લડવા ઇચ્છતા ઉમેદવારો પણ તા. ૨૭ સપ્ટેમ્બરથી તા. ૪ ઓક્ટોબર સુધી પોતાની ઉમેદવારી નોંધાવી શકશે